बिद्री: विश्वकोश लेखन हे अत्यंत अवघड व व्यापक स्वरूपाचे काम असले तरीसुद्धा ते अत्यंत महत्त्वाचे आहे. विश्वकोशामध्ये असलेल्या नोंदी अनेक संदर्भ तपासून शासनाच्या परवानगीनेच प्रसिद्ध केल्या जातात. त्यामुळे विश्वकोशाचा वापर करून आपल्या ज्ञानात भर घालावी व संशोधनासाठी याचा वापर करावा असे मत होमी भाभा विज्ञान शिक्षण केंद्र,मुंबई चे निवृत्त शास्त्रज्ञ विजय लाळे यांनी व्यक्त केले. निमित्त होते दूधसाखर महाविद्यालयात मराठी भाषा संवर्धन पंधरवडा निमित्त मराठी विभाग आणि मराठी विश्वकोश मंडळ, वाई आयोजित विश्वकोश लेखन नोंद कार्यशाळेचे. कार्यक्रमाच्या अध्यक्षस्थानी प्राचार्य डॉ. संजय पाटील होते.
या कार्यशाळेचे दुसरे वक्ते महाराष्ट्र राज्य मराठी विश्वकोश निर्मिती मंडळ वाई चे विद्याव्यासंगी सहाय्यक रवींद्र घोडराज यांनीही विश्वकोश लेखन कसे केले जाते, सर्वसामान्य माणूस सुद्धा या कोशासाठी कसे लेखन करू शकतो यासंबंधी माहिती दिली. विश्वकोश हा महत्त्वाचा लेखन दस्तऐवज आहे त्याचा वापर करावा अशा पद्धतीचे आवाहन यावेळी त्यांनी केले. या कार्यशाळेसाठी महाराष्ट्र राज्य मराठी विश्वकोश निर्मिती मंडळाचे अध्यक्ष डॉ. रवींद्र शोभणे, सचिव डॉ. रमाकांत देवरे यांनी विशेष सहकार्य केले.
कार्यक्रमाचे स्वागत व प्रास्ताविक प्रा. डॉ. सुधीर कुलकर्णी यांनी तर आभार प्रा. डॉ. आनंद वारके यांनी मानले.
सूत्रसंचालन प्रा. डॉ .प्रदीप कांबळे यांनी केले. कार्यक्रमाला प्राचार्य डॉ.शिवाजीराव होडगे यांच्यासह महाविद्यालयाचे सर्व प्राध्यापक, प्रशासकीय कर्मचारी ,विद्यार्थी मोठ्या संख्येने उपस्थित होते.
